صباح/مساء الخير.
أحاول أكتب هذه التدوينة صار لي أسبوع وفي كل مرة أقعد عشان أكتب أنشغل أ أو أتشاغل، لكن خلاص.
المنتجين اللي تدوينة اليوم عنهم من المفضلات عندي وما أستغني عنهم من يوم مادخلتهم بروتيني،
?let's begin, shall we
ORIGINS DRINK UP INTENSIVE OVERNIGHT MASK
الماسك موصُوف بأنه قناع فائق الترطيب للبشرة خلال الليل، وفي المَوقع مذكور بأنه مناسب للبشرة الجافة والعادية.
قبل ما أشتريه سمعت وقريت عنه مدح كثير جداً خلّاني متشوّقة اني أجربه بنفسي وأحكم،
ويوم جربته صراحة عرفت ليه المدح عليه في كل مكان.
أحياناً أحطه في الليل ولما أقوم الصَّباح وأكون ناسية إني حطيته أقعد أمسّك بوجهي متعجّبة كيف رطب وليّن لهالدرجة وبعدين أتذكّر انّي كنت حاطته الليلة الماضية،
بَشرتي جافة إلى عادية وتتحسس بسرعة لكن ماتحسس منّه الحمدلله.
أستخدمه مرتين تقريباً بالاسبوع أو إذا حسيت إن بشرتي تحتاج ترطيب وفي الموقع مَذكُور إنه يُستخدم مرتين بالأسبوع.
من المكوّنات الرئيسية فيه الأفوكادو و زيوت نواة المشمش ودورها المساعَدة في الترطيب العميق، ويتكوّن بعد من أعشاب بحرية يابانية دورها المساعدة في إصلاح الجلد لمنع الجفاف وعلامات الشيخوخة المبكرة.
قوامه ثَقيل كأنه كريم، في بعض المراجعات اللي قرأتها البعض ذكر إنه يطلع لهم حبوب في حال حطو منه كمية كبيرة.
ريحته أحسها صَيفية منعشة، مع أني ما أحب روائح الفواكه وهالأشياء لكن ريحته غير مزعجة و أساساً ماتطول.
شايفين الحجم الصغير؟ هذي عينه أعطاني إياها الموظف قبل ما أشتريه وأستخدمها من إجازة الصيف وما انتهت تماماً لأني ما أحتاج إلا كمية بسيطة منه لكامل وجهي.
وطريقة استخدامي له اني في اليوم اللي أكون ناوية أستخدمه أغسل وجهي وأستعمل تونر وبعدها أحطه، يعني ما أستخدم كريماتي أو أي شي.
آخر شيء الماسك تجميلي أو تكميلي وغير علاجي أبداً.
هَذي عاد أحسها صارت جزء مني خلاص،
قبل ما أشتريها احترت كثييرإلين جزمت إني آخذها، وما تحسفت أبد
أحبهاً جداً لأنه مهما نظفت وجهي ما أحسه نظيف ١٠٠٪ بدونها وخاصة بعد المكياج.
جربت اسفنجة الكونجاك وفرشاة السيليكون من سوب آند غلوري اللي البعض يقول انه بدائل للكليراسونيك وأبداً ما أتفق، مهما نظفت وجهي فيهم بعدالمكياج وإذا جيت أجففه بالمنشفة يطلع آثار مع أني أزيل بذمّه.
-صار لي أكثر من سنة أستخدمها وأستخدمها يومياً تقريباً أو بالأحرى في كل يوم أحط مكياج "وجه" عشان أتأكّد اني أنام ببشرة نظيفة، لأنها تنظف بعممق أحس بدونها اني أكذب على نفسي ومانظفت وجهي زين، أستخدم معها أي غسول يكون صَابوني "أقصد له رغوة" أبلل وجهي أول وبعدين أمد الغسول على وجهي مباشرة وأستعملها، أحيااناً أحط الغسول على الفرشاة مباشرة، حسب مزاجي في اللحظة يعني😂.
-فيها سرعتين ونادراً ما أستخدم السرعة الأقوى، تشتغل لمدة دقيقة مقسّمة على أجزاء الوجة بالشكل التالي:
-عشرين ثانية عالجبهة.
-عشر ثواني عالذقن والأنف.
-عشر ثواني لكل خد.
-ما أعرف كيف أشرحها لكن بعد ماتخلّص العشرين ثانية حقت الجبهه مثلاً تهز "vibration" عشان تبيّن انه وقت الانتقال، قبل ما أشتريها كنت أقول فاضية أنا أجلس أحسب كل يوم، مشوار😂.
-أحياناً ما أستخدمها دقيقة كاملة إذا كان وجهي متحسس من شي، أستخدمها عشرين ثانية لكل الوجه بسرعة.
-كثير يتكلمون عنها إنها تشيل الحبوب أو تساعد ان الحبوب الموجودة تحت الجلد تطلع للسطح والبعض يقولون انها صفّت لهم بشراتهم، أنا بصراحة ما اشتريتها عشان أعالج حبوب أو شي شريتها لتنظيف عَميق، واللي لاحظته إنه في الفترات اللي أوقف استخدامها لسبب أو لآخر ملمس بشرتي يتغيّر، مايكون سَلس.
-جا معها فرشاة وحدة قابلة للفك والتركيب، والفرشاة نفسها ممكن تنفك، مثل الصورة اللي فوق، الفرشاة تتغير كُل ثلاثة أشهر، وفي البداية تكون قاسية نوعاً ما ولكن تلين مع الاستخدام، ولكن مب قاسية لدرجة تمخش الوجة،لا.
-ضد الماء، وشحنها يطول مره-وعشان كذا دائماً أنسى وين حطيت الشاحن- يمكن أشحنها مره في الشهر، بالعادة قبل ما أسافر أشحنها وأترك الشاحن في البيت،لكنها تطول وهي تشحن، أول ماشريتها خليتها تشحن ٢٤ساعة، وبعدها تقريباً ٨ ساعات عشان تشحن بشكل كامل. ويجي معاها غطاء بلاستيكي للسفر وغسول ما استخدمته.
-الحلو فيها لأن الفرشاة حقتها قابلة للفك والتركيب انه أكثر من شخص يقدرون يستخدمونها بنفس الوقت، كُل واحد بفرشاته الخاصة.
أماكن الشراء💸:
-الماسك ماخذيته من هنا لكن أشوف كثير تاجرات يوفرونه، وأذكر ان نوردستروم يوفرون منتجات هالشركة.
-الكليراسونيك من سيفورا.
أعتقد هذا كُل شيء،
سلاماً طيباً.
ليست هناك تعليقات :
إرسال تعليق